როდიდან შეეძლებათ აბიტურიენტებს გამოცდების შედეგების გასაჩივრება?

160

აბიტურიენტთა სააპელაციო განაცხადების მიღება 5 აგვისტოს, 10:00 საათზე დაიწყება და 11 აგვისტოს, 18:00 საათზე დასრულდება.
გამოცდების ეროვნული ცენტრის ინფორმაციით, სააპელაციო განაცხადების შევსება შესაძლებელი იქნება მხოლოდ ელექტრონულად – ვებგვერდებზე: online.naec.ge და www.naec.gov.ge. მსურველებს შესაძლებლობა ექნება, გაასაჩივრონ როგორც კონკრეტული დავალება, ასევე მთლიანი ნაშრომი. დეტალური ინფორმაცია განთავსებულია შეფასებისა და გამოცდების ეროვნული ცენტრის ოფიციალურ ვებგვერდზე.
სააპელაციო განაცხადების მიღების დასრულებამდე, აბიტურიენტებს კიდევ შეუძლიათ აირჩიონ, დაამატონ, ან შეცვალონ საგანმანათლებლო პროგრამები თუ უმაღლესი სასწავლებლები.
”პროგრამების შეცვლის სისტემა იმითაც არის უნიკალური, რომ აბიტურიენტს ქულების გაგების შემდეგ რეალური არჩევანის გაკეთების საშუალებას აძლევს. ცენტრი თხოვნით მიმართავს აბიტურიენტებს, გაითვალისწინონ, რომ საგანმანათლებლო პროგრამებისა და უმაღლესი სასწავლებლების არჩევა თუ შეცვლა სააპელაციო განაცხადების მიღების დასრულებამდეა შესაძლებელი.
შესაბამისად, 11 აგვისტოს, 18:00 საათის შემდეგ, ეს პროცესი შეწყდება. ყველა ცვლილების დადასტურება ელექტრონული ფოსტის საშუალებით უნდა მოხდეს”,- აცხადებენ შეფასებისა და გამოცდების ეროვნულ ცენტრში.

Newstime